Bakı-Quba-Rusiya Federasiyası ilə dövlət sərhədi ödənişli yeni yoldan istifadə xüsusi kartlar vasitəsi ilə həyata keçiriləcək. Bu haqda ShimalNews 21 oktyabr tarixində Azərbaycan Avtomobil Yolları Dövlət Agentliyinə istinadən məlumat verir.
Agentliyin İdarə Heyətinin sədri Saleh Məmmədov bildirib ki, hazırda müəyyən olunmuş yoldan istifadə tariflərinin ödəniş sisteminə inteqrasiyası həyata keçirilir. Ödəniş sisteminin proqram təminatı test edildikdən sonra yol ümumi istifadəyə veriləcək.
Yoldan istifadə xüsusi çip yerləşdirilən kart vasitəsi ilə həyata keçiriləcək. Kartın 2 formada olması nəzərdə tutulub. Yoldan daimi istifadə edən sürücülər daimi kart, vaxtaşırı istifadə edənlər isə müvəqqəti və ya birdəfəlik kart əldə edəcəklər.
Ödənişli yol sistemi sürücülərə adi və dayanmadan keçid zolaqlarından istifadə etmək imkanı verəcək. Adi zolağa daxil olan sürücü ödəniş məntəqələrində keçid üçün kartı əldə edərək avtomobilin ön şüşəsinə yerləşdirir və daha sonra ödənişli yoldan istifadə etmək hüququna sahib olur. Dayanmadan keçid zolağı isə sürücülərə ödəniş məntəqələrində sürəti azaltmadan və dayanmadan keçmək imkanı verir. Bunun üçün sürücüdə əvvəlcədən əldə edilmiş xüsusi çip kart və yetərli ödəniş balansının olması kifayətdir.
