Qusar rayonunda poçt şöbəsi ətrafında yaranmış qalmaqal yenidən gündəmə gəlib. Vətəndaşlar məktublarının icazəsiz açılması ilə bağlı araşdırmanın nəticəsindən narazı olduqlarını bildirirlər.
Shimal.News xəbər verir ki, Qusar Müştəri Xidmətləri Şöbəsinin əməkdaşları tərəfindən vətəndaşlara məxsus məktubların oxunması və həmin məlumatların üçüncü şəxslərə ötürülməsi iddiaları yer alıb. Araşdırma zamanı videogörüntülərin və digər materialların aidiyyəti qurumlara təqdim olunduğu da qeyd edilib.
Məsələ ilə bağlı "Azərbaycan Nəqliyyat və Kommunikasiya Holdinqi"nin (AZCON) vətəndaş müraciətinə cavabında bildirilib ki, şikayət əsasında müvafiq araşdırma aparılması üçün Azərpoçt MMC-yə sorğu göndərilib.
Vətəndaşların sözlərinə görə, təqdim olunan sübutlara baxmayaraq, onlara bu günədək araşdırmanın nəticələri barədə ətraflı məlumat verilməyib. Narazılıq doğuran əsas məqamlardan biri isə iş üzrə araşdırmaya xitam verilməsi və iddialarda adı hallanan şəxslərin fəaliyyətlərini davam etdirməsidir.
Şikayətçilərdən biri bildirib ki, sonuncu dəfə bir qrup sakin tərəfindən kollektiv müraciət göndərilən zaman poçt filialının rəhbəri məktubun ünvanını soruşub, daha sonra isə zərfi açaraq məzmunu ilə tanış olub.
"Sonuncu dəfə biz 4 nəfər kollektiv məktub göndərən zaman filial müdiri gəlib soruşdu ki, məktublar hara gedir. Sonra məktubu açıb oxuyub və ötürüb xəstəxananın o vaxtkı direktoru Kamil Hacıyevə. Hazırda Hacıyev vəzifəsindən kənarlaşdırılsa da, vətəndaşların məktublarını açdığı iddia olunan poçt müdiri hələ də fəaliyyətini davam etdirir", – deyə şikayətçi bildirib.
Xatırladaq ki, 2025-ci ilin may ayında bir neçə Qusar sakini yuxarı dövlət orqanlarına göndərdikləri şikayət məktublarının açılaraq oxunduğunu iddia edib, məsələ ilə bağlı Qusar Rayon Prokurorluğu tərəfindən araşdırmaya başlanıldığı açıqlanmışdı. Həmin ilin iyul ayında isə araşdırmaçı jurnalist Müqəddəs Mehdiyev şikayətçilərdən birinin prokurorluğa əlavə sənədlər və videogörüntülər təqdim etdiyini bildirmişdi.
Hazırda vətəndaşlar təqdim etdikləri materialların hüquqi qiymət almasını və iddiaların obyektiv şəkildə araşdırılmasını tələb edirlər.
