Azərbaycanda həkim nəfəs borusunda yad cisim qalan uşağa soyuqdəymə əleyhinə müalicə yazıb.
Ölkə.az-ın məlumatına görə, bu iddia ilə pediatr Aytən İsmayılzadə çıxış edib. O, hadisənin Zaqatala rayonunda baş verdiyini bildirib:
“Uşaqdan gecələr yatanda qəribə səs gəlirdi, öskürək, xışıltı onu narahat edirdi. Anası uşağı həkimə apararaq rentgen etdirib. Rentgen şəklində bronxda ilişib qalan yad cisim açıq-aşkar görünsə də, həkim uşağa soyuqdəymə əleyhinə müalicə yazıb. Bir aydan çox müddətdə uşağın sağalmadığını görən ana uşağı yenə rentgen etdirib və özü bu qeyri-adi görüntünün fərqinə varıb. O, müqayisə üçün özü də ultrasəs müayinədən keçib.
Sonra mənə göndərdi ki, uşağın bronxunda olan nədir? Bu, udulmuş və nəfəs yoluna düşən bir yastı başlı mıxcıq, aydın görünür. Amma necə olur ki, bunu həkim görmür, rentgen həkimi demir, uşağa soyuqdəymə müalicəsi yazılır? Mütləq şəkildə araşdırılmalı məsələdir. Bu məsuliyyətsizliyi edən valideyn deyil, həkimlərdir”,- deyə o əlavə edib.
