Qusar rayonunda kəndlərarası avtobuslardan istifadə edən sakinlərin şikayətləri göstərir ki, ictimai nəqliyyatla bağlı narazılıqlar artıq adi gecikmə və ya ayrı-ayrı sürücülərin məsuliyyətsizliyi ilə məhdudlaşmır. İnsanlar səhər işə və dərsə çatmaq, axşam isə evlərinə qayıtmaq üçün ciddi çətinliklərlə üzləşirlər. Bəzi kəndlərə avtobus ümumiyyətlə getmir, bəzi istiqamətlərdə isə marşrutlar axşam saatlarında fəaliyyətini dayandırır. Belə vəziyyətdə kənd sakinlərinin ictimai nəqliyyata güvənməsi çətinləşir.
Sakinlərin ən çox şikayət etdiyi məsələ avtobusların iş saatlarıdır. Onların sözlərinə görə, bir çox marşrut saat 18:00-19:00-dan sonra işləmədiyindən işdən, dərsdən və hazırlıq kurslarından çıxan insanlar evə qayıtmaqda çətinlik çəkirlər. Xüsusilə Balaqusar istiqamətində vəziyyət narahatedicidir. Bəzi sürücülərin saat 18:30-dan sonra sərnişin götürmədiyi, hətta uşaqları avtovağzalda düşürərək yolda qoyduğu bildirilir. Sakinlər marşrutların ən azı saat 20:00-22:00-dək işləməsini istəyirlər. Görünür, bəzi marşrutlarda iş qrafiki sakinlərin ehtiyacına deyil, sürücülərin nə vaxt evə getmək istəməsinə uyğun qurulub.
Səhər saatlarında isə vəziyyət heç də yaxşı deyil. Avtobuslar məktəblilər və işə gedən sərnişinlərlə dolu gəlir, bəzən dayanacaqlarda saxlamaq belə mümkün olmur. Sürücülərin dolu avtobusla dayanacaqlardan keçməsi nəticəsində məktəblilər dərsə, işçilər isə işə gecikirlər. Üstəlik, marşrutlar arasında uzun fasilələr var. Xüsusilə 2 nömrəli avtobusun qeyri-müntəzəm hərəkəti sakinlərin narazılığına səbəb olur. İnsanlar gündəlik işlərini avtobusun nə vaxt gələcəyini bilmədən planlaşdırmalı olurlar.
Digər ciddi problem bəzi kəndlərin ictimai nəqliyyatdan kənarda qalmasıdır. Suvacal və Yuxarı Zeyxur sakinləri kəndlərinə avtobus ayrılmasını istəyirlər. Böyük Muruq kəndində də nəqliyyat məsələsi həllini gözləyir. Çiləgir sakinləri 1 nömrəli marşrutun son dayanacağının yuxarı ərazilərə, heç olmasa Vilaj Pro restoranına qədər uzadılmasını tələb edirlər. Balaqusar istiqamətində isə bəzi sürücülərin kəndə daxil olmaq istəməməsi ilə bağlı şikayətlər var. Sakinlər bildirirlər ki, bu barədə tapşırıq verilsə də, bəzi sürücülər yenə də marşrut üzrə hərəkət etməkdən yayınırlar. Əgər müəyyən edilmiş marşrut üzrə hərəkət etmək sürücünün şəxsi istəyindən asılıdırsa, bəs bu qaydalara kim nəzarət edir?
Avtobusların texniki və sanitar vəziyyəti də sakinlərin narazılığından kənarda qalmır. Köhnə, natəmiz, oturacaqları çirk içində olan, yağış yağanda salonuna su dolan avtobuslardan istifadə etmək məcburiyyətində qalan sərnişinlər var. Bəzi nəqliyyat vasitələrinin qara tüstü buraxması isə həm havanı çirkləndirir, həm də sakinlərin sağlamlığı üçün əlavə narahatlıq yaradır. Sürücülərin kobud rəftarı, sərnişinlərlə mübahisə etməsi və söyüş söyməsi barədə şikayətlər də az deyil. İctimai nəqliyyat sürücüsü sərnişinə xidmət göstərdiyini unutmamalıdır. Heç kim öz pulunu ödədiyi xidmət müqabilində təhqir və kobudluqla üzləşməli deyil.
Sakinlər daha müasir avtobusların istifadəyə verilməsini, gediş haqqının kartla ödənilməsini, kəndlər üzrə tələbat nəzərə alınmaqla hərəkət qrafiklərinin yenidən hazırlanmasını da istəyirlər. Bu təkliflər də göstərir ki, problem təkcə avtobusların sayında deyil, ümumi nəqliyyat xidmətinin təşkilindədir.
Bütün bu şikayətlərdən sonra əsas sual yaranır: Qusarın kəndlərində yaşayan insanlar nə vaxt normal ictimai nəqliyyat xidmətindən istifadə edə biləcəklər? Səhər dayanacaqda avtobus gözləyən, axşam isə evinə qayıtmaq üçün taksi axtaran sakinlərin problemi nə vaxta qədər belə davam edəcək? Kəndə ayrılmış marşrutun işləməməsi, sürücünün istədiyi dayanacaqda saxlaması və ya istədiyi vaxt xətti tərk etməsi normal qəbul edilə bilməz. Aidiyyəti qurumlar sakinlərin bu şikayətlərini sadəcə dinləməklə kifayətlənməməli, marşrutların işinə real nəzarət etməli və konkret addımlar atmalıdırlar. Çünki ictimai nəqliyyat kiminsə şəxsi xidməti deyil, insanların gündəlik ehtiyacıdır.
