Yaz-yay ayları bütün sahələrdə olduğu kimi kənd təsərrüfatında işin qızğın dövrüdür. Kəndlərdə yaşayan insanlar özlərinin qış azuqəsi ilə yanaşı mal-qara üçün də yem ehtiyatı görməlidir.
Bizim.Media-nın məlumatına görə, bu il Zaqatalada havaların qeyri-sabit keçməsi xüsusən ot sahələrinin biçilməsində bir sıra çətinliklər yaradıb.
Rayonun Aşağı Çardaxlar kənd sakini Şirxan Gəncəliyevə bu il küllü miqdarda maddi ziyan dəyib. Biçilən ot sahəsi sel-sular altında qalıb:
“1 hektar 70 sot torpağım var. Yonca əkmişdim, budur su gəlib batırıb, pis gündədir. Ən aşağısı 300 pres -bağlama götürəsiydim , 3.50-yə- 4 manata satırdım”, - deyən kənd sakini ona 3 min manata yaxın maddi ziyan dəydiyini bildirir.
Digər tərəfdən birinci çalımda yaxşı ot tədarükü görülmədiyindən ot bağlamalarının qiymətində artım da artıq hiss olunur.
Mal-qara üçün qış ehtiyatı görməyə hazırlaşanlar sırasında Muxax sakinlərinin sözlərinə görə, ot bağlamasının qiyməti azı 1 manat bahalaşıb.
“2 ildir bu vəziyyətdir, yağışdan imkan olmur 1 qram ot götürə bilmirik. Presini yerində 3 manatdan satırdıq”, - deyən Əli İsmayılov qonşusunun 200 bağlama otunun yağış altında qalaraq xarab olduğunu da sözlərinə əlavə edir.
Zaqatala Dövlət Aqrar İnkişaf Mərkəzinin bitkiçilik şöbəsindən verilən məlumata əsasən rayon üzrə 8275 hektar ot sahəsi var. Hektardan məhsuldarlıq 79 sentiner təşkil edir. Şöbədən o da bildirilib ki, bu ilin 1-ci ot biçiminin əsasən yağmurlu havalara təsadüf etməsi maldarlar üçün bir sıra çətinliklər yaradıb, ot bağlamalarını sahələrdən daşıya bilməyiblər. Lakin qarşıdakı iyun, iyul, avqust və sentyabr aylarında daha bir neçə ot biçimi gözlənilir. Fermerlərə tövsiyə edilir ki, biçin vaxtı hava məlumat bürosunun proqnozlarını nəzərə alsınlar.
