Xaçmaz rayonu Xudat şəhərinin yaxınlığındakı Şıxməmməd qəbiristanlığında tarixi qəbirlər var. Bu haqda ShimalNews 23 dekabr tarixində “Bizim.Media”ya istinadən məlumat verir.
Başdaşılara baxdıqda ərəb əlifbası ilə yazılar görmək olar. Seyidlər kəndində yaşayan mərhum Əfqanıstan vətəndaşı Abdullah Bənnan ərəbcə bilirdi. O demişdi ki, qəbirlərin birində "Məhəmməd- Əl-Xudadi” ifadəsi yazılıb. Ehtimal edilir ki, Xudat şəhərinin bu adla bağlılığı var.
“Kişi qəbirlərində qalxan, qılınc, at, dəvə, qadın qəbirlərində isə qızıl-zinət əşyaları həkk olunub. Bütün bunlar ehtimallardır. Hansı ki, elmi yolla araşdırılıb, dəqiq mənası və tarixi müəyyən edilməlidir”, - deyə sakin Rəşad Ağaşirinov bildirib.
Təqaüddə olan tarix müəllimi Ramiz Əliyev isə bildirib ki, Şıxməmməd qəbiristanlığı tunc dövrünə aid Xudat qalasının ərazisində yerləşir. Burada müxtəlif tarixi qəbirlər var. "Məhəmməd-Əl-Xudadi" sözləri yazılmış məzarın isə XVII əsrə aid olduğu ehtimal edilir.
