Haqqın.az-ın məlumatına görə, buna Böyük Britaniyanın Wildheart Animal Sanctuary adlı heyvan sığınacağının təşəbbüsü ilə başladılan genişmiqyaslı kampaniya nəticəsində nail olunub.

Artıq yaxın günlərdə əyləncə adı altında əzab çəkən bu heyvanlar xüsusi reyslə Böyük Britaniyaya aparılacaq. Orada Uayt adasında onları 3500 kv.m ərazisi olan reabilitasiya mərkəzi gözləyir. Bununla ayılar normal həyata qayıda biləcək.

Benji və Balu adlı 2 qardaş ayının hekayəsi, “turist atraksionu” adı ilə ört-basdır edilən vəhşiliyin və qəddarlığın bir salnaməsidir. Onlar illərlə çılpaq beton döşəmədə, dar dəmir qəfəsdə, isti və soyuqdan qorunmadan, hərəkət imkanından məhrum halda saxlanılıb.

Sosial şəbəkələrdə video yayılandan və beynəlxalq rezonans doğurandan sonra Wildheart Animal Sanctuary tərəfindən 150 min funt sterlinq toplamaq üçün kampaniya keçirildi. Lazımi məbləğ 2024-cü ilin oktyabrında toplanandan sonra tikinti işlərinə başlanıldı. Məqsəd, Qafqaz boz ayıları üçün təbii şəraitə maksimal uyğun sığınacaq inşa etmək idi.

Lakin ən çətin məsələ bu 2 iri yırtıcının Cənubi Qafqazdan Atlantik okeanındakı adaya daşınması oldu. Belə hallarda vəhşi heyvanların daşınması üçün dövlət mexanizmləri adətən mövcud olmur. Həll isə Lüksemburq mənşəli Cargolux adlı özəl aviaşirkət tərəfindən tapıldı. Şirkət nəinki bütün nəqliyyat xərclərini, həm də təhlükəsizlik, gigiyena və etik standartlara uyğun xüsusi konteynerlərin hazırlanmasını öz üzərinə götürdü.

“Cargolux dəstəyi olmasaydı, bu layihə kağız üzərində qalacaqdı,” — deyə Wildheart sığınacağının baş direktoru Lourens Beyts jurnalistlərə bildirib. Onu da əlavə edib ki, bu şirkət 2 beluqa balinasını Çindən İslandiyaya təxliyə edərək bu işdə mütəxəssis olduğunu göstərib.

Benji və Balunun taleyi – təəssüf ki, sonuncu deyil. Bəzi restoran, otel və şəxsi obyektlərdə canavar və ya aslan kimi vəhşi heyvanlar “əyləncə elementi” kimi istifadə olunur.