Xaçmazın Qusarçay kənd tam orta məktəbinin binasında əsaslı təmir işləri davam etdirilir. Bu barədə ShimalNews 4 may tarixində RİH-yə istinadən məlumat verir.
İcra başçısı Elnur Rzayev məktəbdə aparılan yenidənqurma işləri ilə tanış olub. Burada təmir işləri ilə yanaşı, təhsil ocağı üçün 2 yeni korpusun inşası da həyata keçirilir.
Məktəb 48 sinif otağı, 4 laboratoriya, müxtəlif fənn kabinetləri, akt və idman zalları, kitabxana, eləcə də 360 yerlik yeməkxanadan ibarət olacaq. Təhsil ocağında eyni vaxtda 960 şagirdin təhsil alması üçün hər cür şərait yaradılacaq.
Məlumata görə, yenilənən məktəb binası bilik günündə qapılarını müəllim və şagirdlərin üzünə açacaq.
