Xaçmaz rayonunun bələdiyyə torpaqlarına aid massivdə 100-ə yaxın ağac kəsilib. Bu haqda ShimalNews 2 iyul tarixində Konkret.az-a istinadən xəbər verir.
Uzunoba kəndi ərazisində diametrləri 30-80 sm aralığında olan vələs və qovaq ağacları naməlum şəraitdə məhv edilib. Son günlər bu ərazilərdən sel keçməsi səbəbindən əməli törədənlər qırdıqlarını tam olaraq daşıya bilməyiblər.
Dövlət Ekoloji Təhlükəsizlik Xidməti hadisəni təsdiqləyib:
“Xaçmaz rayonu Xəzərli kəndinin qeyri-meşə fondu ərazisində ağacların kəsilməsi ilə bağlı bu ilin iyun ayında Dövlət Ekoloji Təhlükəsizlik Xidmətinə daxil olan məlumat Xidmətin yerli idarəsinin əməkdaşları tərəfindən araşdırılıb və ağacların kəsildiyi faktı təsdiqini tapıb.
Faktla bağlı akt tərtib olunub. Dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış sənədlər Azərbaycan Respublikası Baş Prokurorluğuna göndərilməsi üçün hazırlanır.
Qeyd edək ki, bu ilin əvvəllərində də sözügedən ərazidə ağacların kəsildiyi faktı müəyyən edilərək akt tərtib olunmuş və toplanmış materiallar Baş Prokurorluğa göndərilmişdi”.
