Bir müddət öncə Qusarçayın Xaçmaz rayonu ərazisindən keçən hissəsində yerləşən körpüdə çatların əmələ gəldiyi barədə xəbər dərc etmişik.
Sakinlər Shimal.News-a məlumat veriblər ki, məsələnin həlli ictimai qınaq doğurub.
Gəndob–Yalama avtomobil yolunun üzərindəki körpünün həm giriş, həm də çıxış hissələrində gözlə görünən çatlar müşahidə olunur. Bunun qarşısını almaq üçün Yol İstismar İdarəsi həmin çatları qırla doldurub.
"Camaatı bədbəxt etmək istəyirsiniz? Bu yolun da Qudyalçayın üzərindəki uçan körpünün aqibətini yaşaması lazımdır?", - deyə sakinlər cavabdeh qurumlara irad bildiriblər.
Sakinlər deyirlər ki, körpü əsas və əlverişli keçid hesab olunur. Onun sıradan çıxması ilə Xudat və Nabran istiqamətində yerləşən, yüz minə yaxın əhalinin nəqliyyat əlaqəsi tamamilə kəsilə bilər. Ərazidə alternativ keçidin olmaması isə riski daha da artırır.
Aidiyyəti qurumların körpünün texniki vəziyyətini yoxlaması və təhlükəsizlik tədbirlərinin görülməsi tələb olunur.
