Xaçmazın Aşağı Zeyid kəndində yaşayan Böyük Vətən müharibəsi veteranı Məhəmməd Məmmədov 100 yaşına yaxınlaşıb. Bu barədə ShimalNews 10 may tarixində “Bizim.Media”ya istinadən məlumat verir.
Böyük Vətən müharibəsində qazanılan tarixi qələbənin 79-cu ildönümü günündə Xaçmaz Veteranlar Şurasının sədri Abasyar Heydərov və əmək veteranı Qəhrəman Abdullayev 1 əsr həyat görmüş M.Məmmədovu ziyarət ediblər. Onun 100 illiyi iyul ayının 1-də olacaq.
1942-ci ildə 17 yaşlı Məhəmməd cəbhəyə yollanıb, Qroznıdan Berlinə qədər döyüş yolu keçib. 1945-ci ildən sonra doğulduğu kəndə qayıdan Məhəmməd Məmmədov kənddəki sovxozda anbar və ferma müdiri işləyib.
15 il əvvəl həyat yoldaşını itirən Məhəmməd kişi onunla 7 övlad böyüdüb, boya-başa çatdırıb. O, Xaçmazdan olan müharibə iştirakçılarından yeganə sağ qalanıdır.
