Xaçmazda becərilən ləzzətli və qeyri-adi dada malik meyvə yetişib. Şirinliyinə və rənginə görə ona el arasında konfet və ya şokolad ağacı deyirlər. Bu haqda ShimalNews 1 dekabr tarixində “Azərtac”a istinadən məlumat verir.
Bağban Qurban Qəribov deyir ki, bizim uşaq hər gün bu ağacdakı meyvələrdən toplayıb, sinif yoldaşları üçün aparır.
Xaçmazlı bağban ölkəmizdə nadir rast gəlinən bitkini 8 il əvvəl əkib. Artıq 3 ildir ki, “konfet”lər tədarük olunur.
“Noyabrın axırı - dekabrda ağac yarpaqlarını tökür, meyvələri şirinləşir. Mart ayına kimi “konfet”lər ağacda qalır. Şaxta, qar bu meyvəyə təsir etmir. Qaldıqca daha da şirinləşir. Çox şirin olsa da, istifadə edildikdə şəkəri, təzyiqi qaldırmır. Hələ bunun iyul ayında çiçəklərini görəsiniz. Bütün ağaclarda meyvə olan vaxt konfet ağacı çiçək açır. Çox gözəl görünüşü olur”, - deyə Qurban Qəribov söyləyir.
Bu ağac dünyada “şirin hoveniya” kimi tanınır. Onun vətəni Yaponiya, Şərqi Çin, Koreya və Himalay ətrafı ərazilərdir. Hündürlüyü isə 10-20 metrədək olur.
