Xaçmazın 88 yaşlı Gödəkli kənd sakini Balasoltan Daşdəmirovun 100-ə yaxın üstündə gilas olan ağacları qonşusu tərəfindən kəsilib. Bu barədə ShimalNews 22 may tarixində Real TV-yə istinadən məlumat verir.
“Bu sahə Daşdəmirov Rəşid Balasoltan oğluna verilib. Rəşid də mənim oğlumdur. Bu gilasları da Rəşid əkib. 18 ildir qonşu Bahadurov İmran Sultanmahmud oğlu qanunsuz olaraq, oğlumun 57 sot torpağını zəbt edərək, geri qaytarmır. 3 məhkəmənin - 1-ci instansiya, 2-ci apellyasiya məhkəməsi, ali məhkəmənin qərarı ilə qaytarmalı olmasına baxmayaraq, həmin şəxs əməllərindən əl çəkmir. Axırda Bakıdan gəlib, sahəni burda ölçüb, bizə veriblər. Bizim xəbərimiz olmadan dünən salıb bura ekskavatoru, doğrayıb, bu hala salıb gilaslarımızı”, - deyə Balasoltan Daşdəmirov bildirib.
Həmin bağ qonşusu İmran Bahadurov isə deyilənlərlə razılaşmır. O bildirir ki, yer də, elə ağaclar da ona məxsusdur. Ağacları isə yeni sortlar əkmək məqsədi ilə kəsib: Balasoltan kişi fındıq vaxtı gəlirdi ki, bu fındıq yeri mənimdir. İndi gilas yetişir, gəlib ki, bu gilas mənimdir”.
Məsələ ilə bağlı Daxili İşlər Nazirliyinin Mətbuat Xidmətinin Şimal regional qrupu bildirib ki, ağacların kəsilməsi ilə bağlı Balasoltan Daşdəmirov müraciət edib. Hazırda tədqiqat bölməsində araşdırma aparılır. Yekunda məsələyə düzgün hüquqi qiymət veriləcək.
[video width="1280" height="720" mp4="https://shimal.news/storage/photos/2024/05/Bir-gecanin-icinda-100-a-yaxin-agac-kasilib_1.mp4"][/video]
