Xaçmaz rayonunun sakini özünüməşğulluq proqramına qoşulandan sonra çətinliklərlə qarşılaşıb. Bu haqda ShimalNews 4 noyabr tarixində “Bizim.media”ya istinadən məlumat verir.
Hacıqazma kəndində yaşayan Ələddin Talıbov Dövlət Məşğulluq Agentliyinə müraciət edib. O, 2019-cu ildə növbəyə durub, 4 ildən sonra - cari ilin iyul ayının 11-də ona 21 baş qoyun verilib. Müqavilə 10 gün öncə təqdim olunmalı olduğu halda, təhvil-təslim aktı ilə birgə verilib. Qoyunlardan 1 qoç və 4 dişi 12 gün sonra tələf olub.
Sənədlərdə göstərilir ki, hər hansı qüsur olarsa, heyvanları alandan sonra 30 gün müddətində vətəndaş agentliyin filialına müraciət edə bilər.
Ələddin Talıbov hesab edir ki, burada da müqavilə şərtləri pozulub:
“Alandan 12 gün sonra heyvanlar tələf olmağa başlayıb. Mən də dərhal müraciət etmişəm, baytar gəlib, ölü heyvan cəsədlərini yarıb və protokol tərtib edilib. Şərtlərə görə, qoyunların artımı üçün verilən qoç 2-4 yaşında olmalıdır, mənə verilən qoç isə quzu idi. Onunla necə artım olacaqdı ki? Üstəlik həmin quzu da öldü, indi heç artım olmayacaq, həm də qalan qoyunlar da sağlam deyil, xəstədir".
Şikayətçi rəsmi qurumlara dəfələrlə yazılı müraciət etsə də, heç bir nəticə vermədiyini bildirib.
