Antiterror tədbirləri zamanı yaralanan hərbi qulluqçularımız Xaçmaz Rayon İcra Hakimiyyəti tərəfindən ziyarət olunublar. Bu barədə ShimalNews 24 oktyabr tarixində adıçəkilən quruma istinadən xəbər verir.
İcra başçısı Elnur Rzayev Xudat şəhərindən olan müddətdən artıq həqiqi hərbi qulluqçular çavuş Rəfail Səlimov və Zaur Məmmədovla görüşüb. Onların sağlamlığı və müalicəsi, eyni zamanda ailələrinin qayğıları ilə maraqlanıb. Eləcə də terrorçulara qarşı aparılan hərbi əməliyyatlarda göstərdikləri qəhrəmanlığa və şəxsi şücaətə görə təşəkkür edib.
Söhbət zamanı yaralı döyüşçülər öz təəssüratlarını bölüşüblər. Göstərilən diqqət və qayğıya görə Prezident cənab İlham Əliyevə və birinci vitse-prezident Mehriban xanım Əliyevaya minnətdarlıqlarını ifadə ediblər.
Rəfail Səlimov və Zaur Məmmədov həm də Vətən müharibəsi iştirakçısıdır. Onlar Prezident tərəfindən “Füzulinin azad olunmasına görə”, “Cəbrayılın azad olunmasına görə”, “Xocavəndin azad olunmasına görə” və digər medallarla təltif ediliblər.
