Xaçmaz rayon MKS-nin Qaradağlı kənd kitabxana filialı və sənətkarlıq klubunun əməkdaşları "Hürriyyət şairi" adlı məlumat saatı keçirib. Bu barədə ShimalNews 26 iyul tarixində sosial şəbəkələrdə yayılan məlumata istinadən xəbər verir.
Tədbir Azərbaycan ədəbiyyatının görkəmli nümayəndəsi, böyük şair, tanınmış maarifçi və ictimai xadim Əhməd Cavadın 130 illiyi ilə əlaqədar təşkil edilib.
Bildirilib ki, o, ədəbi-bədii fikri tarixində istiqlal şairi kimi özünəməxsus dəst-xəti ilə seçilən, müstəsna mövqeyə malik söz ustalarındandır. Bütün qəlbi ilə bağlı olduğu doğma xalqının müstəqillik ideallarına həyatı boyu sadiq qalmış sənətkarın azadlıq motivləri ilə zəngin yaradıcılığı milli məfkurədən yoğrulub. Azərbaycanın dövlət rəmzlərini yüksək şeiriyyətlə alovlu tərənnüm edən şairin müstəqil dövlətçiliyə sevgi aşılayan əsərləri dərin vətənpərvərlik duyğularının heyrətamiz poetik ifadəsidir.
Əhməd Cavad daim ictimai-siyasi hadisələrin qaynar nöqtələrində olub, dövrün parlaq şəxsiyyətləri sırasında 1930-cu illərin ağır repressiyalarına məruz qalaraq, sovet totalitarizminin qurbanına çevrilib.
Daha sonra tədbir iştirakçıları kitab sərgisi ilə tanış olublar.
