Xaçmaz şəhərinin mərkəzində antisanitar vəziyyət aradan qaldırılıb və cavabdeh şəxs məsuliyyətə cəlb edilib. Bu barədə ShimalNews 24 noyabr tarixində məlumat verir.
Dünən N.Nərimanov küçəsində ərazinin zibilliyə çevrildiyinin görüntülərini təqdim etmişdik.
Məsələ Xaçmaz Rayon Polis Şöbəsi tərəfindən nəzarətə götürülüb və yaranan antisanitar vəziyyət aradan qaldırılıb.
“Sosial şəbəkələrdə Xaçmaz rayonu ərazisində sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi ilə bağlı məlumat yayılmışdı.
İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsinin tələblərini pozduğuna görə məsul şəxslərin barələrində tədbir görülüb”, - deyə DİN-in Mətbuat Xidmətinin Quba regional qrupundan baş leytenant Xəyal Talıbov bildirib.
