Xaçmazlı təsərrüfatçıları verilən subsidiyaların az olması narahat edir. Bu barədə ShimalNews 29 iyul tarixində AzTV-yə istinadən məlumat verir.
10 il əvvəl salınan şaftalı bağlarında meyvə yığımına bu ayın əvvəlindən başlanılıb. Təsərrüfatçıların son illər ərsəyə gətirdikləri intensiv meyvə bağlarında məhsul boldur və yeni sort şaftalının satışında çətinlik yoxdur.
Ümumilikdə rayon ərazisində 2900 hektar şaftalı bağı var ki, bunun da 800 hektarı müasir suvarma sistemi ilə təmin olunan intensiv bağlardır. Hər il bağlardan 7 min tondan çox şaftalı yığılır. Bütün bunlara baxmayaraq bağ sahibləri hələ də hədəflərinə çata bilmədiklərini deyillər.
“Gübrələr, dərmanlar, bunlar həqiqətən qiymətinə görə uyğunlaşmır, bahalaşıblar. Indi dərman olmasa, bizim bu bağları inkişaf etdirmək mümkün deyil. Indi, sağ olsunlar bizə subsidiya verirlər, ancaq indiki dövr ilə əlaqədar bizim üçün bu subsidiya azdır”, - təsərrüfatçı Ramazan Quliyev bildirib.
Fermerlər deyir ki, aqrotexniki qaydalara düzgün riayət etsələr, istehsalı 9 min tona qədər artırmaq mümkündür.
