Ailə, Qadın və Uşaq Problemləri üzrə Dövlət Komitəsinə daxil olmuş məlumatda yetkinlik yaşına çatmayan Xaçmaz rayon sakininin nişanlanması öz əksini tapıb. Bu haqda ShimalNews 6 may tarixində “Apa”ya istinadən məlumat verir.
Komitənin Uşaq məsələləri şöbəsinin böyük məsləhətçisi Təranə Piriyeva qeyd edib ki, məsələ nəzarətə götürülüb. Xaçmaz Rayon İcra Hakimiyyəti yanında Yetkinlik yaşına çatmayanların işləri və hüquqlarının müdafiəsi üzrə komissiyaya rəsmi məktubla müraciət edilib, işçi qaydada danışıqlar aparılıb.
"Yetkinlik yaşına çatmayanın hüquqlarının müdafiəsi məqsədilə hər iki ailə ilə məsələ ətrafında profilkatik söhbətlər aparılıb, erkən nikahın yaradacağı fəsadlar və hüquqi məsuliyyəti barədə hər iki ailə məlumatlandırılıb. Eyni zamanda məsələ hüquq mühafizə orqanları tərəfindən nəzarətə götürülüb" - deyə Komitə rəsmisi bildirib.
