44 günlük Vətən müharibəsinin ikinci günü hərbi əməliyyatlar bütün cəbhəboyu davam edib.
Shimal.News xatırladır ki, 2020-ci ilin 28 sentyabr tarixində Azərbaycan Ordusunun sürətli əks-hücum əməliyyatları zamanı Talış kəndi ətrafındakı əlverişli yüksəklikləri düşməndən azad edilib.
Həmin vaxt Ermənistanın çoxsaylı hərbi texnikası, o cümlədən 22 tank, 15 "OSA" zenit-raket kompleksi və 18 pilotsuz uçuş aparatı məhv edilib. Düşmən 550 nəfərdən çox canlı qüvvə itkisi verib.
Düşmənin Tərtər rayonuna artilleriya zərbələri nəticəsində Azərbaycan tərəfindən 3 nəfər mülki şəxs həlak olub, 5 nəfər isə yaralanıb. Ermənistanın mülki əhaliyə qarşı bu təxribatları dünya ictimaiyyətinə çatdırılıb.
Azərbaycan Prezidenti İlham Əliyev həmin gün BMT Baş katibi Antonio Quterreş ilə videokonfransda baş verən təxribatları və Azərbaycanın özünümüdafiə haqqını müzakirə edib.
