Quba rayonunun Vəlvələ kəndində məhəllədaxili yollar sakinlər üçün əsl sınağa çevrilib. Yolun bir başından digər başına qədər uzanan çalalar, yağışdan sonra su ilə dolaraq hərəkəti çətinləşdirən gölməçələr narazılıq yaradır. Sakinlərin sözləri ilə desək, yollar artıq aşsüzəni xatırladır.
Shimal.News-a danışan kənd sakinlərinin sözlərinə görə, məhəllədaxili yolların böyük hissəsi bərbad vəziyyətdədir. Bir çaladan yayınan sürücü digərinə düşür, piyadalar isə palçıq və gölməçələr arasından keçməyə çalışırlar.
Sakinlər bildirirlər ki, xüsusilə yağışlı havalarda vəziyyət daha da çətinləşir. Yollarda yaranan gölməçələr səbəbindən nə rahat piyada hərəkət etmək, nə də avtomobillə maneəsiz getmək mümkündür.
Onların sözlərinə görə, məhəllə yollarının təmirinə ehtiyac olsa da, problem hələ də həllini tapmayıb. Sakinlər aidiyyəti qurumların əraziyə diqqət ayırmasını və yolların təmir olunmasını istəyirlər.
