Qışın sərt şaxtası Quba, Qusar, Xaçmaz, Şabran və Siyəzənin kəndlərində təkcə insanları deyil, mədəniyyəti də dondurub. Kəndlərin mədəniyyət evləri və klubları illərdir soyuğun əsirinə çevrilib.
Shimal.News məlumat verir ki, bir zamanlar içində səs-küy, musiqi, teatr olan bu məkanlar indi buz kimi divarları, soyuq kresloları və boş zalları ilə tərk edilmiş qış yataqxanasına bənzəyir.
Bu mədəniyyət ocaqlarının istiliyi odunla təmin olunmalıdır, amma illərdir onlara bir kəsək odun belə verilmir. Halbuki, kəndin hər evində, hər həyətində bir soba var və hər kəs bilir ki, oda odun atılmasa, ocaq sönər. İndi isə bu mədəniyyət ocaqları, sözün əsl mənasında, odun qıtlığından külə dönməkdədir.
İşçilər haqlı olaraq işə getmir. Kim -10 dərəcə şaxtada, əli donmuş halda, nəfəsindən buxar çıxan buz kimi otaqlarda işləmək istəyər? Mədəniyyət evlərində çalışan insanlar qapını açıb içəri daxil olanda elə bil Sibirə düşürlər. Paltolarını çıxarmadan masa arxasına keçən işçilər, kompüterin düyməsinə toxunanda barmaqları donur. Səhnəyə çıxmaq istəyən aktyorlar, sanki açıq havada tamaşa göstərirmiş kimi əsim-əsim əsirlər. Bu, Azərbaycan mədəniyyətinin acı gerçəkliyidir.
Bəs Quba-Xaçmaz Regional Mədəniyyət İdarəsi nə edir? Heç nə. Onlar mədəniyyət ocaqlarına odun paylamaq əvəzinə, məsələyə gözlərini yumublar. Sanki qış onlara aid deyil, sanki bu müəssisələr onların tabeliyində deyil. Onlar öz isti kabinetlərində əyləşib, kəndlərdə donan mədəniyyət işçilərinin taleyini unudublar.
Görəsən, onlar mədəniyyəti yalnız tədbirlərdə çıxış edərkən yada salırlar? Yoxsa mədəniyyət yalnız əyləncəli konsertlər və tədbirlərdən ibarətdir? Axı, bu mədəniyyət ocaqları təkcə binalar deyil, bu xalqın ruhudur. Əgər bir xalqın mədəniyyət ocaqları qaranlıq və soyuq içində çürüyürsə, deməli, o xalqın gələcəyi də dumanlıdır.
Əgər aidiyyəti qurumlar öz məsuliyyətini dərk etmirsə, o zaman bu soyuq divarlar, boş oturacaqlar, səssiz səhnələr onlara qarşı bir ittiham aktına çevriləcək. Mədəniyyətin donmuş vəziyyətini görmək üçün uzağa getməyə ehtiyac yoxdur – sadəcə bu kənd klublarına bir baxmaq kifayətdir.
Hələ gec deyil. Qış hələ davam edir, və bu ocaqları yenidən alovlandırmaq mümkündür. Amma bunun üçün istək və məsuliyyət lazımdır. Əks halda, Azərbaycan mədəniyyətinin bu bölgədəki son mənzərəsi – boş, buz bağlamış zallar və içində bir nəfər də olmayan klublar olacaq.
