Quba, Qusar, Xaçmaz və Şabran rayonlarından olan həssas təbəqə uşaqlar üçün Yeni il şənliyi təşkil edilib. Bu haqda ShimalNews 27 dekabr tarixində məlumat verir.
Görmə əlilliyi olan 18 yaşınadək uşaqlar valideynlərinin müşayiəti ilə Qubada keçirilən tədbirdə iştirak ediblər. Gənc Tamaşaçılar Teatrının aktyorları onları bacardıqları qədər rəqs etməyə, mahnı oxumağa, şeir deməyə dəvət edərək, əyləndirməyə çalışıblar.
Eləcə də aktyorların iştirakı ilə şou proqramlar, musiqi nömrələri, viktorina və fləşmoblar təqdim olunub, yemək və şirniyyat süfrəsi açılıb, hədiyyələr verilib.
Tədbir “Qayğıya Ehtiyacı Olan Şəxslərə Sosial Dəstək” və Gözdən Əlillər Cəmiyyəti İctimai birlikləri tərəfindən Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyinin sifarişi ilə ümummilli lider Heydər Əliyevin 100 illik yubileyinə həsr olunmuş silsilə tədbirlər çərçivəsində Dünya Azərbaycanlılarının Həmrəyliyi Günü münasibətilə baş tutub.
