Dövlət İmtahan Mərkəzi (DİM) abituriyentlərə səhv istiqamət göstərənlərlə bağlı müraciət edib. Bu barədə ShimalNews 26 iyul tarixində mərkəzə istinadən məlumat verir.
“Facebook” və xüsusilə “Instagram” sosial şəbəkələrində ayrı-ayrı şəxslər özlərini ekspert kimi təqdim edərək abituriyentlərə ödəniş müqabilində ali və orta ixtisas təhsili müəssisələrinə ixtisas seçimi həyata keçirə biləcəklərini yazırlar. Sonda isə onların səhv istiqamət və yanlış cavablar verdikləri məlum olur.
Abituriyentlər ixtisas seçimi zamanı diqqətli olmalı, bu tip şəxslərin aldadıcı çağırışlarına əhəmiyyət verməməli və ən əsası ixtisas seçimini özləri həyata keçirməlidirlər.
“Abituriyentin elektron ixtisas seçimi ərizəsi”nin doldurulma və təsdiq edilmə qaydası, müsabiqə şərtləri, ixtisas seçimi zamanı diqqət yetirilməli olan vacib məsələlərlə bağlı ödənişsiz fəaliyyət göstərən “Məsləhət mərkəzləri”nə müraciət etmək olar.
Məsləhət mərkəzləri Dövlət İmtahan Mərkəzinin Xaçmaz və digər regional bölmələrində fəaliyyət göstərirlər.
Ali və orta ixtisas təhsili müəssisələrinə ixtisas seçiminin tarixləri müəyyən olunan kimi ictimaiyyətə məlumat veriləcək.
