Şimal bölgəsində ilkin hərbi qeydiyyata alınan və müddətli həqiqi hərbi xidmətə çağırılan, təkrar tibbi şəhadətləndirilməyə cəlb edilən vətəndaşların tibbi müayinəsi Qubada aparılacaq. Bu haqda ShimalNews 30 aprel tarixində məlumat verir.
6 may 2024-cü il tarixindən etibarən Quba, Qusar, Xaçmaz, Siyəzən və Şabran rayonları vətəndaşlarının Rayon Mərkəzi Xəstəxanasında (RMX) tibbi müayinəsi keçiriləcək.
Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) rəisi Mürsəl İbrahimov və İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev razılaşma sənədi imzalayıblar.
Xəstəxana həftəiçi hər gün saat 9:00-dan 18:00-dək fəaliyyət göstərir. Tibbi baxış zamanı çağırışçılar cərrah, terapevt, nevroloq, psixiatr, oftalmoloq, otorinolarinqoloq, stomatoloq, dermatoveneroloq, psixoloq və zərurət olduqda digər ixtisaslardan olan həkim-mütəxəssislər tərəfindən müayinə ediləcəklər.
RMX-nin ünvanı: Quba şəhəri, Fətəli Xan küçəsi, 42.
