Quba, Qusar və Xaçmaz rayonlarında yeni sahibkarlıq subyektləri yaradılır. Bu barədə ShimalNews 28 iyul tarixində Report-a istinadən məlumat verir.
Adıçəkilən rayonlarda “Kəndlərdə sahibkarlığın və özünüməşğulluğun inkişafı” layihəsi çərçivəsində qonaq evləri yaradılır. Hazırda obyektlər lazım olan avadanlıqlar ilə təmin edilir.
Layihə kənd turizminin inkişafına və kəndlərdə məşğulluğa dəstək məqsədilə təşkil olunur. Sahibkarlar turizm-xidmət sahələri üzrə müvafiq biliklərə yiyələnmələri üçün təlimlərə cəlb olunublar. Turizm obyekti kimi istifadə olunacaq ərazidə də təmir işləri aparılıb.
Layihə Kiçik və Orta Biznesin İnkişafı Agentliyi (KOBİA), Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi və Dövlət Turizm Agentliyinin dəstəyi ilə həyata keçirilir.
