Qış fəsli bizim üçün sona çatır, lakin təəssüf ki, bu mövsüm yenə də dəm qazı faciələri ilə yadda qaldı.
Rəngsiz, qoxusuz və dadsız olduğu üçün "səssiz ölüm" adlandırılan dəm qazı, hər il çoxsaylı insanın həyatına son qoyur.
Mətbuatda gedən son xəbərlərə baxsaq görərik ki, Şimal regionunda cəmi 3 ay ərzində 6 nəfər dəm qazından dünyasını dəyişib. Daha dəhşətlisi, martın ilk 10 günündə ölkə üzrə 28 nəfər zəhərlənib və bunlardan 17-si həyatını itirib. Bu, sadəcə rəqəm deyil, hər biri bir ailənin, bir dost dairəsinin dərin itkisidir...
Bu faciələrin səbəbini axtararkən günahı yalnız bir tərəfə atmaq doğru olmaz. Burada bir neçə amil rol oynayır. Təəssüflər olsun ki, faciələrin çoxu insanların sadə təhlükəsizlik qaydalarına əməl etməməsindən qaynaqlanır. Köhnə, nasaz qızdırıcı cihazların istifadəsi, havalandırmanın kifayət qədər olmaması, gecə yatarkən qazla işləyən cihazların söndürülməməsi ən çox müşahidə olunan səhvlərdir.
Köhnə bina və evlərdə havalandırma sistemlərinin lazımi qaydada olmaması, qaz avadanlıqlarının vaxtlı-vaxtında yoxlanılmaması və təmir edilməməsi də əsas səbəblərdəndir.
Dəm qazı təhlükəsi barədə ictimai məlumatlandırma kampaniyaları artsa da, hələ də yetərli deyil. Xüsusilə ucqar ərazilərdə yaşayan insanların bu məsələ barədə məlumatlılıq səviyyəsi çox aşağıdır.
Dəm qazı faciələrinin qarşısını almaq üçün kompleks yanaşma tələb olunur.
Hər bir vətəndaş öz evində qaz təhlükəsizliyi qaydalarına ciddi əməl etməli, qaz cihazlarının vəziyyətini daim yoxlamalıdır.
Dəm qazı detektorları: Bu sadə cihazlar həyat xilas edir. Evlərdə dəm qazı detektorlarının quraşdırılması məcburi olmalıdır.
Qaz avadanlıqları vaxtlı-vaxtında yoxlanılmalı və təmir edilməlidir.
Məktəblərdə, KİV-lərdə və sosial şəbəkələrdə dəm qazı təhlükəsi barədə daimi məlumatlandırma kampaniyaları aparılmalıdır. Bundan əlavə qaz təhlükəsizliyi sahəsində qanunvericiliyin təkmilləşdirilməsi və nəzarətin gücləndirilməsi vacibdir.
Hər birimiz anlamalıyıq ki, dəm qazı təsadüfi bir təhlükə deyil, qarşısı alına bilən faciədir. Məlumatlı, diqqətli və məsuliyyətli olmaq həyatımızı xilas edə bilər.
Bir cəmiyyət olaraq, gələn qış mövsümünü bu qədər faciəli statistikalarla qarşılamamaq üçün indidən tədbirlər görməliyik. Çünki itirdiyimiz hər bir insan həyatının qiyməti ölçüləbilən deyil...
Davud Maqsudov
