Şəki Dövlət Regional Kolleci və onun rəhbərliyi barəsində ciddi iddialar səsləndirilib.
Bu iddialar uzun illər həmin təhsil ocağında çalışmış, pedaqoq, musiqiçi Yaqub Yusifovun Bakupost.аz-a müraciətində yer alıb.
Onun bildirdiyinə görə, qədim təhsil ənənəsinə malik olan kollecdə hazırda təhsildən çox “rüşvət və özbaşınalıq” hökm sürür.
Şikayətçi bildirib ki, tələbələr semestr imtahanlarında rüşvət verməyə məcbur edilir:
Foto: Yaqub Yusifov
“Tələbələrdən hər semestr 350-500 manat arası pul alınır. Pul verməyənə qiymət yazılmır. Dərslərdə iştirak edən yoxdur, tədrisə münasibət isə faciəvidir”, - deyə o vurğulayıb.
Yaqub Yusifov kollecin direktoru Sərdar Şərifovun və dərs hissə müdiri Sevinc Abdurahmanovanın rəhbərliyi altında tədrisin tamamilə ikinci plana keçdiyini iddia edir.
O, rəhbərliyin rüşvətlə diplom verdiyini, dərs saatlarının qanunsuz azaldıldığını və şəxsən ona qarşı qərəzli münasibət göstərildiyini bildirib:
"Məni dərs saatlarımdan məhrum edib, 65 yaşımı bəhanə edərək müəllimlikdən uzaqlaşdırdılar. Daha sonra məktəbdə məni sadəcə piano sazlayan kimi təsdiq etdilər. Bu, açıq-aşkar qisasçılıqdır".
Məsələ ilə bağlı Şəki Dövlət Regional Kolleci ilə əlaqə saxlanılıb.
Kollecdən bildirilib ki, səslənən iddialar əsassızdır:
“Biz həmin şəxsi 65 yaşı bitdikdən sonra da humanistlik edib işdə saxladıq. Müddətli əmək müqaviləsi ilə 5 il müddətinə işlə təmin etdik. 70 yaşı bitdikdən sonra isə müqavilə bağlamadıq”.
