Şəkinin Şin kəndindən təxminən 7-8 km şimal-şərqdə yerləşən və əsas sel ocaqlarından biri olan Bırkaş (Salavat aşırımı ilə Böyük Qoruq dağları arası ərazi) qolu və eyni adlı dərədə ekoloji monitorinq işləri aparılıb.
Shimal.News xəbər verir ki, AMEA-nın Şəki Regional Elmi Mərkəzinin Ekoloji coğrafiya şöbəsinin əməkdaşı Elvin Qarayev 5 - 6 may tarixlərində şəlalə aşkar edib.
E.Qarayev Böyük Qoruq dağının şimal yamacında baş verən səthi eroziya ilə bağlı tədqiqatlar aparıb. O, sözügedən ərazidə heç bir elmi mənbədə qeyd olunmayan, dəniz səviyyəsindən 1290 metr hündürlükdə yerləşən və koordinatları 41°23′24″ N, 47°10′51″ E olan yeni şəlalə qeydə aldığını söyləyib. Onun hündürlüyü 18 metr, eni 1.05 metr təşkil edir.
Ətrafda boz qayalıq relyef olduğu üçün tapıntı E.Qarayev tərəfindən “Boz qaya şəlaləsi” adlandırılıb. Buradan götürülən suyun nümunələri Şəki REM-də laborator şəraitdə yoxlanılıb. Onun sərtliyi 18,9° C temperaturda 8.36 pH olduğu müəyyənləşdirilib.
