Şəki rayonunda bu il martın 25-də 42 yaşlı kişi arvadına xəsarət yetirib.
Demokrat.az-ın məlumatına görə, kənd sakini, 1983-cü il təvəllüdlü Əhəd yaşadığı evdə arvadı Ramilə (adlar şərtidir – red.) ilə mübahisə edib. Mübahisənin səbəbi ailə başçısının spirtli içki qəbul etməsi və ailəyə maddi yardım göstərməməsinin qadında haqlı irad yaratması olub.
Aralarında yaranmış mübahisə zamanı ər arvadının boyun və ənsə nahiyyəsinə əli ilə zərbələr vurub. Ona müxtəlif dərəcəli bədən xəsarətləri yetirib.
Hadisəni törədən Əhədin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən şəxs ona elan olunmuş ittiham üzrə özünü təqsirli bilib. O, ifadəsində peşman olduğunu, arvadı ilə barışdığını göstərib.
Cinayət işinə Şəki Rayon Məhkəməsində baxılıb. Məhkəmə zərərçəkmişin həyat yoldaşını bağışlamasını və ona qarşı şikayətini geri götürməsini nəzərə alaraq, təqsirləndirilən şəxs barəsində cinayət təqibinə xitam verib. Nəticədə Əhəd cinayət məsuliyyətindən azad olunub.
