Bu gün səhər saat 6:00-dan başlayaraq Azərbaycanın Rusiya ilə sərhəddə yerləşən şimal və şimal-şərq rayonlarında - Qusar, Quba, Xaçmaz, Şəki, Oğuz, Qəbələ, Zaqatala, Balakən, Qax rayonlarında ənənəvi "Sərhəd-sipər" əməliyyatları başlayıb.
Bizim.Media-nın məlumatına görə, əməliyyatlar ölkələrin daxili işləri nazirlikləri arasında bağlanan qarşılıqlı sazişə əsasən aparılır.
Analoji əməliyyatlar Rusiyanın Dağıstan Respublikasının Azərbaycanla həmsərhəd rayonlarında da icra olunur.
Rayonlara daxil olan nəqliyyat vasitələri postlarda yoxlanılır. Əməliyyatlar zamanı yerli əhalidə olan qanunsuz silahların təhvil verilməsi də tələb olunur.
Silahları könüllü təhvil verənlərin məsuliyyət daşımadığı barədə əhali arasında izahedici söhbətlər aparılır.
Ənənəvi "Sərhəd-sipər" əməliyyatları bir həftə davam edəcək. Onların keçirilməsində məqsəd iki qonşu ölkə arasında mövcud olan əməkdaşlıq əsasında mütəşəkkil cinayətkarlığa, narkobiznesə və digər cinayətkarlığa qarşı birgə mübarizə aparmaqdır.
