İcra hakimiyyəti vətəndaşların səyyar qəbulunu Qusarın Yuxarı Zeyxur kəndində keçirib. Bu barədə ShimalNews 8 dekabr tarixində məlumat verir.
Görüşdə sakinlər kənddə görülmüş işləri qeyd etməklə yanaşı, onları narahat edən məsələlərdən də söz açıblar. Bu zaman əkin sahələrində gəmirici və zərərvericilərə qarşı dərman preparatlarının kənddə satışının təşkili, lizing yolu ilə iribuynuzlu mal-qaranın alınması, kənddaxili küçələrin hamarlanması, təbii qaz olmayan fərdi yaşayış evlərin qazlaşdırılması, Samur-Həzrə yolunun Yuxarı Zeyxur ərazisindən keçən hissəsinin təmiri, elektrik enerjisi verilişində tez-tez baş verən fasilələrin aradan qaldırılması və digər məsələlərin həllinə köməklik göstərilməsi xahiş edilib.
Qaldırılan məsələlər dinlənilib, onlara bir sıra müvafiq izahatlar verilib. Çətinliklərin həlli üçün əlaqədar idarə və təşkilat rəhbərlərinə tapşırıqlar verilib.
