Qusar şəhərində bəzi mərkəzi küçələrin asfalt örtüyü yararsız vəziyyətə düşüb.
Report.аz-ın məlumatına görə, sakinlər bildiriblər ki, bir sıra küçələrə yeni asfalt örtüyü çəkilsə də, Əmir Mustafayev və Tolstoy küçələri əsaslı təmir işlərindən kənarda qalıb. Bu isə onlar üçün müəyyən problemlər yaradır.
Xüsusilə, payız-qış mövsümündə yağıntıların intensivləşməsi nəticəsində həm piyadaların, həm də nəqliyyat vasitələrinin hərəkəti xeyli çətinləşir. Belə bir şəraitdə məktəblilərin qayğıları daha da artır – onlar nə qədər çalışsalar da, qeyd olunan küçələri palçığa bulaşmadan keçə, evdən məktəbə və ya əksinə, səliqəli vəziyyətdə gələ bilmirlər.
Sakinlər məsələ ilə bağlı rayonun aidiyyəti dövlət qurumlarına təkrar-təkrar müraciət etdiklərini, hətta məsul məmurların qəbulunda olduqlarını da bildiriblər. Lakin hər dəfə “Problemin həlli nəzarətimizdədir” cavabını alıblar. Ətrafdakı küçələrdən fərqli olaraq, adları çəkilən iki küçənin indiyə qədər asfaltlanmamasının səbəbi sakinlər üçün hələ də qaranlıq qalır.
Qusar Rayon İcra Hakimiyyətindən bu səfər bildirilib ki, haqqında danışılan küçələrdə təmir işlərinin cari ildə həyata keçirilməsi planlaşdırılır:
“Yolların asfaltlanması ilə bağlı qeyd edək ki, ayrılan maliyyə vəsaiti hesabına rayon ərazisində 2024-cü il ərzində 8 küçəyə asfalt örtüyü çəkilib. Rayonun müvafiq ərazisindəki ara yolların bu il asfaltlanması nəzərdə tutulur. Bu istiqamətdə işlər davam etdiriləcək”.
