Dövlət Məşğulluq Agentliyi Qusarda əmək yarmarkası keçirib. Bu haqda ShimalNews 26 oktyabr tarixində Azərtac-a istinadən məlumat verir.
Yarmarkada işaxtaranlara 21 peşə və ixtisas üzrə 80 boş iş yeri təqdim olunub. Burada işəgötürənlər tərəfindən təklif edilən əməkhaqqı 400-800 manat arasında olub.
Təqdim olunan iş yerlərinin 74-ü peşə təhsili, 6-sı isə ali və orta ixtisas tələb edən vakansiyalardır. Yarmarkaya çıxarılan vakansiyaların 21-i xidmətçi, 14-ü mühafizəçi, 9-u qrup rəhbəri, 5-i ofisiant, 5-i camaşırxana işçisi, 3-ü kiçik qrup rəhbəri, 3-ü hostes, qonaqlara xidmət üzrə menecer, qonaq qəbulu üzrə agent, barmen, gecə meneceri, koordinator, kuryer, qida və içki üzrə menecer müavini, mexanik və digər vəzifələr üzrədir.
Tədbirin keçirilməsində əsas məqsəd işəgötürənlə işsiz və işaxtaranların birbaşa görüşünü təşkil etməklə vətəndaşların məşğulluğunun və əmək bazarına çıxışının təmin olunmasıdır.
