Qusar Olimpiya İdman Kompleksində təşkil edilən “Sağlam həyat tərzi” adlı gənclər düşərgəsi başa çatıb. Bu barədə ShimalNews 2 sentyabr tarixində Gənclər və İdman Nazirliyinə istinadən məlumat verir.
Düşərgədə 24 rayon və şəhərdən 80 gənc iştirak edib. Onun təşkilində məqsəd gənclərin asudə vaxtlarının səmərəli təşkili ilə yanaşı, onların sağlamlıq barədə biliklərinin artırılması və müxtəlif rayonların gəncləri arasında dostluq əlaqələrinin yaradılması olub.
Burada fiziki və psixoloji sağlamlıq, zərərli vərdişlər, sağlam qidalanma, şəxsi inkişaf və digər mövzularda maarifləndirici təlimlər keçirilib. Eləcə də düşərgədə müxtəlif idman növləri üzrə (basketbol, voleybol, futbol) yarışlar, estafet oyunları, yoqa və rəqs dərsləri, istedadlar şousu baş tutub.
