Qusar rayonu ərazisində torpaq sahələrini qanunsuz satmaqda şübhəli bilinən bələdiyyə sədri cinayət məsuliyyətinə cəlb edilib. Bu barədə ShimalNews 16 may tarixində Baş Prokurorluğun Mətbuat Xidmətinə istinadən məlumat verir.
Ekoloji hüquqpozmaların törədilməsi və digər qanun pozuntuları üzrə fakta görə Baş Prokurorluqda başlanmış cinayət işinin ibtidai istintaqı Baş prokuror yanında Korrupsiyaya qarşı Mübarizə Baş İdarəsində davam etdirilir.
İstintaqla Qusar bələdiyyəsinin sədri Əlfəddin İbrahimovun vəzifə səlahiyyətlərini aşmaqla torpaq sahələrini qanunsuz olaraq satmasına, bilə-bilə qanunsuz hərəkətlərə görə külli miqdarda rüşvət almasına və vəzifə saxtakarlığı törətməsinə əsaslı şübhələr müəyyən edilib.
Toplanmış sübutlar əsasında İbrahimov Cinayət Məcəlləsinin 3 maddəsi ilə təqsirləndirilən şəxs qismində cəlb edilib. Məhkəmənin qərarı ilə barəsində həbs qətimkan tədbiri seçilib.
