Milli Məclisin keçirdiyi iclasda Azərbaycanın Qusar rayonu ərazisindəki “Samur” və Rusiyanın “Yaraq-Qazmalar” sərhəd buraxılış məntəqələrində avtomobil körpüsünün istismarı müddəti müəyyən olunub. Bu barədə ShimalNews 22 may tarixində məlumat verir.
Parlamentin İqtisadi siyasət, sənaye və sahibkarlıq komitəsinin sədri Tahir Mirkişili müzakirə zamanı bildirib ki, istifadə 12 il müddətində növbəli şəkildə həyata keçiriləcək.
Onun sözlərinə görə, istismar dedikdə nəqliyyat vasitələrinin sayı, sərnişin və piyadaların fasiləsiz və təhlükəsiz hərəkətini təmin etmək məqsədilə avtomobil körpüsünün təmiri və saxlanması üzrə tədbirlər kompleksi nəzərdə tutulur:
“Avtomobil körpüsünün istismarı ilə bağlı bütün xərcləri tərəflər bərabər paylarla ödəyəcəklər. Eyni zamanda avtomobil körpüsünün istismarı Samur çayının su axınını dəyişdirməməli, onun məcrasında sabit zolaqda, Azərbaycan–Rusiya dövlət sərhədi xəttində dəyişiklik etmədən, həmçinin ekoloji və digər təhlükəsizliyə ziyan vurmamalıdır”
