Hazırda ölkəmizdə fəaliyyət göstərən üç qış turizm mərkəzindən biri "Şahdağ"dır. Burada olan son qiymətlər araşdırılıb. Bu barədə ShimalNews 19 dekabr tarixində “Bizim.Media”ya istinadən məlumat verir.
Adıçəkilən Turizm Mərkəzinin sədri Rüstəm Nəcəfov mətbuata açıqlamasında bildirib ki, bu il yanvarın 1-dən dekabrın 15-nə qədər hotellərdə 67.821 nəfər gecələyib. Bura gələnlərin ümumi sayı isə 158.506 nəfər olub. Bu isə 2022-ci illə müqayisədə 15% çoxdur.
Qonaqlar, ilk növbədə, qarda xizək sürməyi seçirlər. Xizək çubuğunun qiyməti 27-53, ayaqqabısı 18-32, dəbilqə 10, şalvar 17-20, qar lövhəsinin qiyməti 36 manatdır.
Mövsümi xizəyin özünün qiyməti 650 manatdır. Bir uşaq üçün isə 370 manat əlavə ödəməli olacaqsınız.
Əgər heç bir şey istifadə etməyib, sadəcə, dağda yürüş etsəniz, 30-80 manat xərcləməlisiniz. Bu qiymət dağda gəzintinin vaxtı ilə ölçülür.
Mərkəzdə 24 restoran, kafe fəaliyyət göstərir. Şorbalar 6 manatdan başlayır, qazsız su - 5, ayran - 3 manatdan başlayır. Spirtli içkilərin qiyməti 4-200 manat arasında dəyişir. Azərbaycan şirniyyatları, məsələn: bir porsiya paxlava və şəkərbura 10 manata təklif olunur.
Hoteldə qalmaq istəyənlərə: bir gecəlik hotel qiymətlərinin ən ucuzu 175 manatdır. Otaqlar genişliyinə, mənzərəsinə görə fərqli qiymətlərə təklif olunur. Yanvar ayının sonunda dağ mənzərəli otağın bir gecəlik qiyməti 2500 manatdır.
