Şəki Apellyasiya Məhkəməsində quldurluqda təqsirləndirilən Fərid Bolayev barəsində çıxarılmış hökmə qarşı verilən apellyasiya şikayətinə baxış başa çatıb.
Pravda.az-ın məlumatına görə, hakim Akif Eyvazovun sədrliyi ilə keçirilən prosesdə qərar elan olunub. Qərara əsasən, apellyasiya şikayəti təmin edilməyib.
İttihama görə, 2019-cu il avqustun 16-da üç nəfər naməlum şəxs Zaqatala rayonunun Çökək kənd sakini Teymur Ağakişiyevin evinə quldurluq niyyəti ilə daxil olub. Onlar ev sahiblərinin əl-qolunu bağlayaraq hədə-qorxu gəlib və pul tələb ediblər. Daha sonra 400 manata yaxın pul və 1000 manat dəyərində qızıl-zinət əşyalarını ələ keçirərək ərazidən qaçıblar.
Hadisə ilə bağlı Zaqatala Rayon Polis Şöbəsi tərəfindən mənzilə baxış keçirilib. Aparılan əməliyyat-axtarış tədbirləri nəticəsində cinayətin rayonun Kebeloba kənd sakinləri – 31 yaşlı Fərhad Zəngiyev, 21 yaşlı İsmayıl Zəngiyev və Fərid Bolayev tərəfindən törədildiyi müəyyən edilib. Fərhad və İsmayıl Zəngiyevlər şübhəli şəxs qismində saxlanılaraq Polis Şöbəsinə gətirilib. Onların cinayət zamanı istifadə etdikləri əlcəklər, maskalar və digər əşyalar maddi sübut kimi götürülüb. Araşdırma zamanı həmçinin məlum olub ki, Fərhad Zəngiyevin ev sahibləri ilə qohumluq əlaqələri olub.
Hadisədən sonra Fərid Bolayev cinayət məsuliyyətindən yayınaraq ölkədən qaçıb və 2024-cü ilin avqustunda Rusiyada saxlanılıb. Daha sonra o, Azərbaycana ekstradisiya edilib.
Şəki Ağır Cinayətlər Məhkəməsinin hökmü ilə Fərid Bolayev 10 il müddətinə azadlıqdan məhrum edilib.
