Quba rayonunun Püstəqasım kəndində sakinlər gecə saatlarında ciddi çətinliklərlə üzləşirlər.
Məsələ ilə bağlı Shimal.News-a danışan yerlilərin sözlərinə görə, yol kənarlarında işıq dirəkləri olmadığı üçün ərazi tamamilə qaranlığa qərq olur.
“Qonşu kəndlərdə yollar işıqlandırıldığı halda, Püstəqasım bu gün də qaranlıqda qalır. Hava qaraldıqdan sonra bu yollar həm piyadalar, həm də sürücülər üçün böyük təhlükələrə səbəb ola bilər. Yolların bu vəziyyəti xoşagəlməz fəsadlara səbəb ola bilər.
Kənd məktəbi iki növbəli olduğuna görə uşaqlarımız üçün də narahatıq. Bir neçə gün sonra dərslər başlayacaq, ikinci növbədə təhsil alan uşaqların məktəbə gediş-gəlişində də çətinlik yaşanacaq.
Aidiyyəti qurumlardan tez bir zamanda problemimizin həlli üçün hərəkətə keçib, yollarımızı işıqlandırmalarını istəyirik”,- deyə kəndlilər bildiriblər.
