Quba rayonunun Qrız kəndində turizm brendinin yaradılmasına dair təlim keçirilib.
Shimal.News xəbər verir ki, tədbir “4 mövsüm Qrız” layihəsi çərçivəsində “Alternativ” Kommunikasiya və Tədqiqatlar İctimai Birliyi tərəfindən Dövlət Turizm Agentliyinin donorluğu ilə təşkil olunub.
Təlimin əsas məqsədi turizm sahəsində qadınların rolunun artırılması, eləcə də yerli icma üzvlərinin turizm potensialından düzgün və davamlı şəkildə faydalanmasını təşviq etməkdir.
Kənd sakinləri İlqar və Səkinə Yaqubovların ev təsərrüfatında yaradılan yerli turizm xidmətləri nümunəsində yerli dəyərlərin və resursların tanıdılması, brendləşmə strategiyaları və təbiət-tarix sintezinin təqdimatı keçirilib.
“Biz bu layihə ilə göstərmək istəyirik ki, kəndlərdə, xüsusilə də dağlıq ərazilərdə yaşayan qadınlar turizmin əsas hərəkətverici qüvvəsinə çevrilə bilərlər. Qrız bu baxımdan mühüm nümunədir”, - deyə layihə rəhbəri, “Alternativ” Kommunikasiya və Tədqiqatlar İctimai Birliyinin sədr müavini Jalə Quliyeva bildirib.
Qrız kəndinə haykinq turuna gələn amerikalı turist Blaque Saur da təlimdə iştirak edib. O bildirib ki, kənd və burada təklif olunan turizm xidmətləri haqqında internet resurslarında daha geniş məlumat verilməsinə, qonaqlama yerlərinin, ictimai iaşə yerlərinin sayının artırılmasına və kənddə turistləri istiqamətləndirən lövhələrin quraşdırılmasına ehtiyac var.
