Quba şəhərinin mərkəzində yerləşən Əliqulu Nərimanov küçəsi gecələr tamamilə qaranlığa qərq olur.
Shimal.News-a müraciət edən sakinlərin sözlərinə görə, küçədə işıq dirəkləri olsa da, illərdir gecə vaxtı heç bir işıqlandırma təmin olunmur. Bu vəziyyət, həm piyadaların təhlükəsizliyini ciddi şəkildə təhdid edir, həm də ərazidə hərəkəti çətinləşdirir.
Sakinlərin narahatlığına səbəb olan digər məsələ isə küçədə sahibsiz itlərin fəallaşmasıdır. Günün qaranlıq saatlarında itlər insanlara hücum edir. Xüsusilə axşam işdən və dərsdən qayıdan qadın və uşaqlar üçün bu küçədən keçmək sınağa çevrilib.
“Uşağımı məktəbdən götürüb evə qayıdanda daim ehtiyat edirik. Küçə zülmət qaranlıqdır, itlər isə sürü ilə dolaşır. Axırıncı dəfə qonşumuzun uşağına hücum etdilər, şükür ki, ciddi xəsarət almadı,” – deyə vətəndaş bildirib.
Sakinlər dəfələrlə aidiyyəti qurumlara müraciət etsələr də, nəticə yoxdur.
