Quba şəhəri turistlərin və təbiətsevərlərin sevimli istiqamətlərindən biri olsa da, şəhərin gözəl mənzələrindən olan - Dəvədabanı yaşayış massivinin giriş hissəsi, bu gün göz oxşamaq əvəzinə, ürək sıxır.
Shimal.News-a müraciət edən sakinlər bildirirlər ki, keçmiş Kərpic Zavodunun yaxınlığında yerləşən bu möhtəşəm mənzərə nöqtəsinin hər yerini kol-kos basıb, zibillik görünüşü alıb.
Təəssüf doğuran məqam isə odur ki, bu ərazi nə vaxtsa qanunsuz tikintinin qurbanı olub. Tikinti dayandırılsa da, sonrası ilə heç kim maraqlanmayıb.
Yerli sakinlər haqlı narahatlıqlarını belə ifadə edirlər:
"Bura şəhərin ən yüksək nöqtələrindən biridir, bütün Qubaya buradan baxmaq mümkündür. Əgər ərazi abadlaşdırılsa, gözəl park salınsa, həm şəhərə yaraşar, həm də insanlar üçün istirahət məkanına çevrilər. Tikinti üçün əlverişli yer deyil, torpaq sürüşməsi baş verə bilər. Amma normal bir yaşıllıq, park salmaq mümkündür. Belə mənzərəni məhv etmək cinayətdir”.
