Bakı-Quba-Rusiya sərhədi avtomobil yolunun Qubanın Qaraçay və İqrıq kəndləri ərazisindən keçən hissəsində ekoloji təəssüf doğuran mənzərə yaranıb. Bir müddət əvvəl ətraf mühitin abadlaşdırılması və yaşıllığın artırılması məqsədilə yol kənarlarında əkilən yüzlərlə şam ağacı bu gün baxımsızlıq səbəbindən qurumaqdadır.
Shimal.News-a müraciət edən sakinlər bildirirlər ki, ağacların qurumasına əsas səbəb onların vaxtında suvarılmaması və ətrafının alaq otlarından təmizlənməməsidir:
“Həmin ərazilərdə uzun müddətdir heç bir qulluq işləri aparılmır. İqlim şəraitinin isti və quraq keçdiyi mövsümdə ağacların suya olan ehtiyacı nəzərə alınmadan, bu sahəyə tamamilə biganə yanaşılması, görülən işlərin sadəcə “göstəriş” xatirinə həyata keçirildiyini deməyə əsas verir”.
Qeyd edək ki, dövlət tərəfindən yaşıllıq salınması, ekoloji tarazlığın qorunması üçün hər il xeyli vəsait ayrılır. Lakin belə hallarda bu vəsaitin səmərəsiz xərcləndiyi ortaya çıxır. Əkilən ağaclara qulluq göstərilmədikdə, layihələrin davamlılığı təmin olunmadıqda, nəticədə nə təbiətə fayda dəyir, nə də görülən işlər özünü doğruldur.
