Qubada pavloniya bitkisinin çoxaldılaraq yetişdirilməsinə başlanılıb. Bu barədə ShimalNews 27 iyul tarixində AZƏRTAC-a istinadən məlumat verir.
Sözügedən bitki Meyvəçilik və Çayçılıq Elmi-Tədqiqat İnstitutunun istixana kompleksində yetişdirilir. Az qulluq tələb edən bu ağac ildə təxminən 3-4 metr boy atır. Pavloniya ən çox mebel sənayesi və dekorativ bitkiçilikdə istifadə olunur.
Orta ömrü 70 il olan ağacın vətəni Çindir. May ayında bənövşəyi, ətirli, boruşəkilli və salxım şəklində olan çiçəklərini görmək mümkündür.
Pavloniyanın taxtası əyilmə, qırılma kimi təsirlərə davamlıdır və çox qiymətlidir.
