Meşələrin İnkişafı Xidmətinin rəisi Ramik Əşrəfov Quba rayonunda yaşıllıq ərazilərdə yanğının başvermə ehtimalından danışıb. Bu barədə ShimalNews 6 iyul tarixində məlumat verir.
Bildirilib ki, meşə yanğınlarının çox təhlükəli olması və əksər hallarda ağır fəsadlarla nəticələnməsi hər bir vətəndaşın daim diqqətində olmalıdır. Buna uyğun olaraq, qabaqlayıcı profilaktik tədbirlər görülməkdədir.
Meşə ilə həmsərhəd ərazilərdə yanğın əleyhinə mineral zolaqlar çəkilir, nəzarət postlarının və müşahidə qüllələrinin sayı artırılır.
“Mütəmadi olaraq, vətəndaşlarımıza, təbiət qoynunda istirahət edən turistlərə, meşə ətrafında yaşayan kənd sakinlərinə, kənd təsərrüfatı ilə məşğul olan sahibkarlara və fermerlərə müraciət edirik ki, qızmar yay günlərində hədsiz diqqətli olsunlar, yanğın təhlükəsizliyi qaydalarına ciddi əməl etsinlər, odla ehtiyatlı davransınlar, biçindən sonra sahələrə od vurmasınlar. Bilməliyik ki, hər birimizin ani ehtiyatsızlığı və yaxud da məsuliyyətsizliyi qarşısıalınmaz yanğınlara səbəb olur.
Vətəndaşlarımıza çağırış edirik ki, təbiətə, insanlara ölçüyəgəlməz zərər vuran yanğınlardan nəticə çıxaraq və hamımızı sarsıdan bu cür ürəkağrıdıcı fəlakətlə bir də üzləşməmək üçün daha da duyarlı olaq. Meşə yanğınlarının çox ciddi və təhlükəli olması hər bir vətəndaşın daim diqqətində olmalı və bu həyəcanı hər kəs hiss etməlidir”, - deyə xidmət rəisi bildirib.
