Quba-Xaçmaz yolunda insan həyatını təhlükəyə atan vəziyyət yaranıb.
Bu barədə Shimal.News-a məlumat verən sakinlər bildiriblər ki, bir neçə gün öncə onların gözləri qarşısında az qala bir gənci avtomobil vursun.
Söhbət yolun Barlı kəndinin girişindən Amsarqışlaq kəndinə dönən hissəyədək olan məsafədən gedir. Bu ərazidə işıqlandırma dirəklərinin bir qismi yanmır, bəzi yerlərdə isə sadəcə fənərin bünövrəsi qalıb, özü yoxdur. Qaranlıq düşən kimi yol tamamilə görünməz hala gəlir.
Sakinlər deyirlər ki, vəziyyəti daha da təhlükəli edən bəzi sürücülərin bu hissədə tez-tez sürət həddini aşmasıdır. Gecə saatlarında piyadaları görmək mümkün olmur və qəza riski dəfələrlə artır.
Onlar aidiyyəti qurumlara müraciət etsələr də heç kəs məsələyə məsuliyyətlə yanaşmayıb. Vətəndaşlar işıqlandırmanın bərpasını və nəqliyyatın hərəkətinin təhlükəsiz şəkildə təmin olunmasını tələb edirlər.
Shimal.News məsələni diqqətdə saxlayır. Cavabdeh qurumların mövqeyini və ya gördükləri tədbir barədə məlumatı dərc etməyə hazırıq.
