Qubanın İkinci Nügədi kəndi ərazisində yerləşən Çənlibel gölünün hasarlanması sosial şəbəkələrdə gündəmə gətirilib. Bu haqda ShimalNews 1 noyabr tarixində “Qafqazinfo”ya istinadən xəbər verir.
Videonu paylaşan vətəndaş bildirib ki, bu süni gölün ətrafı 3 il əvvələ qədər açıq olub: “Çox gözəl mənzərəsi olan yerdir. Düz meşənin içində yerləşir. Bura rahat gəlib piknik edirdik. İndi isə “Macara Lake Park” İstirahət Mərkəzinin təhlükəsizlik xidmətinin əməkdaşları buranı bağlayıblar. İnsanlara icazə verilmir ki, bura gəlib, istirahət etsinlər. Əvvəllər belə deyildi. Hər kəs sərbəst şəkildə dincəlirdi. Mənə elə gəlir ki, bu, qanunsuzdur. Heç vaxt buna icazə verilə bilməz”.
Məsələ ilə bağlı İkinci Nügədi Kənd Bələdiyyə sədri Alim Mütəllimov açıqlama verib. O bildirib ki, bu ərazi “Macara Lake Park” tərəfindən icarəyə götürülüb:
“Düzdür, əvvəllər ora dövlət mülkiyyəti kimi qeydiyyata alınmışdı. Hazırda isə bu istirahət mərkəzi ərazini icarəyə götürüb və bununla əlaqədar yanlarını hasarlayıb. Buna səbəb əraziyə kənar şəxslərin daxil olmaması və göldə batma hallarının qarşısının alınmasıdır. Çünki bir neçə il əvvəl yay aylarında buradan çimərlik adı ilə istifadə edən 3 nəfər təhlükəsizlik qaydalarına riayət etmədiyi üçün batıb. Artıq təxminən 4-5 ildir ki, gölün ətrafı hasarlanıb”.
[video width="1920" height="1080" mp4="https://shimal.news/storage/photos/2023/11/Sequence-018.mp4"][/video]
