Xırdabuynuzlu heyvanların taunu (PPR) xəstəliyinə dair planın müzakirəsi və dabaq xəstəliyi (FMD) üzrə Quba rayonunda assosiativ-simulyasiya məşqləri keçirilib. Bu haqda ShimalNews 3 iyul tarixində “Azərtac”a istinadən məlumat verir.
Simulyasiyanın konsepsiyasına uyğun olaraq, şərti xəstə heyvandarlıq təsərrüfatında epizootoloji monitorinq keçirilib. Götürülmüş diaqnostik nümunələr Azərbaycan Qida Təhlükəsizliyi İnstitutunun (AQTİ) 2+ biotəhlükəsizlik səviyyəsinə malik səyyar laboratoriyalarında analiz olunub. Ətraf təbiət sahələrində müşahidələrin aparılması üçün isə dron tipli videokameralardan istifadə edilib.
Təlimlərdə Azərbaycan Respublikası Qida Təhlükəsizliyi Agentliyinin, AQTİ-nin, Kənd Təsərrüfatı, Fövqəladə Hallar, Ekologiya və Təbii Sərvətlər, Daxili İşlər nazirliklərinin aidiyyəti qurumlarının və Quba Rayon İcra Hakimiyyətinin nümayəndələri iştirak ediblər.
Təlimlərin keçirilməsi epizootik böhran vəziyyətlərinə ölkəmizin hazırlığının artırılması ilə yanaşı, əldə edilmiş təcrübənin əyani olaraq region ölkələrinə çatdırılması məqsədini daşıyıb.
