Quba Rayon Mərkəzi Xəstəxanasının hemodializ şöbəsində müalicə alan xəstələr və tibb heyəti aylardır havasızlığa məhkum ediliblər.
Shimal.News xəbər verir ki, həssas sağlamlıq problemləri ilə üzləşən bu insanlar təmiz hava almaq kimi fundamental bir ehtiyacdan məhrumdurlar.
Bir neçə ay əvvəl şöbənin plastik pəncərələrinin nasazlığı və soyuq hava kütləsinin içəriyə daxil olması barədə xəstəxana rəhbərliyinə məlumat verilib. Problemi “həll etmək” üçün rəhbərlik pəncərələri metal vintlərlə bağlamaq barədə qərar qəbul edib.
İndi nə xəstələr, nə də tibb işçiləri pəncərələri aça bilmirlər. Nəticədə insanlar havasız mühitdə saatlarla qalmağa məcbur olurlar.
Bu yanaşma tibbi və humanitar baxımdan nə qədər düzgün olduğu sual yaradır: “TƏBİB və digər aidiyyəti qurumlar bu problemdən xəbərdardırmı?”.
